Plaid Cymru Gwynedd Grŵp Cynghorwyr

Mae Cynghorydd Plaid Cymru dros Benrhyndeudraeth, Gareth Thomas, wedi derbyn newyddion y bydd blaenoriaeth yn cael ei roi i ddiogelwch cerddwyr ar hyd prif ffordd yr A487 yng nghanol Penrhyndeudraeth wrth i linellau melyn gael eu cyflwyno ar rannau o'r ffordd.

Llun o'r Cynghorydd Gareth Thomas, Penrhyndeudraeth

“Dwi’n falch o glywed y newyddion,” esboniodd y Cynghorydd Gareth Thomas, sydd wedi bod yn galw am welliant i ddiogelwch cerddwyr, yn enwedig plant, oedolion ifanc a phobl hŷn sy'n defnyddio'r briffordd trwy Benrhyndeudraeth yn ddyddiol. Mae tri digwyddiad gyda phlant wedi bod yn y lleoliad dros y blynyddoedd diwethaf.

“Diolch byth ni chafodd neb anaf tymor hir, ond fel trigolion lleol, byddwn yn rhoi ochenaid o ryddhad pan gymeradwyir yr hysbysiad hwn i wahardd parcio ar y brif ffordd ar ran o Stryd y Castell ac Eryri Terrace.

“Yn ogystal, bydd llif y traffig trwy ganol Penrhyndeudraeth yn cael ei wella, gan fod pobl leol yn fwy ymwybodol nag eraill pa mor anodd yw symud ar hyd y ffordd, hyd yn oed yn ystod cyfnodau tawelach misoedd y gaeaf!

“Mae tymor yr haf yn ofnadwy, a dim ond wythnos yma, roedd traffig yn sefyll yn stond am hanner milltir yn y pentref. Mae'n achosi problemau go iawn i bobl leol a busnesau sy'n ceisio cyflawni eu tasgau dyddiol.

Bydd Llywodraeth Cymru bellach yn cynnal ymgynghoriad, gan ofyn i'r cyhoedd fynegi barn ar y cynlluniau presennol. Bydd copïau o’r hysbysiad a map o'r lleoliad i’w gweld yn Siop Dewi, Penrhyndeudraeth am y chwe wythnos nesaf.

Yn ôl y Cynghorydd Thomas: “Yn yr hirdymor, y gobaith yw y bydd croesfan diogelwch i gerddwyr hefyd yn cael ei gosod ar y ffordd, fel y gall plant a phobl hŷn sy'n croesi'r ffordd wneud hynny'n ddiogel. Mae plant o dair stad tai lleol yn croesi ar y gyffordd hon i gyrraedd eu hysgolion, ac mae pobl hŷn hefyd yn defnyddio'r un gyffordd i gyrraedd y feddygfa a'r fferyllfa yn y pentref.

Roedd y Cynghorydd Thomas wedi galw ar Weinidog Trafnidiaeth Llywodraeth Cymru i gynnal asesiad diogelwch brys o'r gyffordd A487 ger Garej Deudraeth yn y dref yn dilyn nifer o ddigwyddiadau ar y safle a damwain yn ymwneud â phlentyn ym mis Chwefror 2016. A nôl ym mis Mawrth 2015 pan gafodd bachgen lleol wyth oed ei hedfan i'r ysbyty, pwysleisiodd y Cynghorydd Thomas i’r Gweinidog bwysigrwydd cynnal adolygiad safle yn yr ardal. Anfonwyd gohebiaeth at y Gweinidog hefyd cyn y digwyddiad yn 2015, gan holi i’w swyddogion edrych ar broblemau traffig y stryd fawr.

Cafodd Hayden Roberts oedd yn 10 oed ar y pryd, ei hedfan i'r ysbyty yn 2015 yn dilyn gwrthdrawiad ar ffordd yr A487. Yn ôl ei fam, Rachel Owen o Adwy Ddu ym Mhenrhyndeudraeth: “Roedd hi'n hunllef pob rhiant pan gyrhaeddon ni'r lleoliad i weld ein mab wedi bod mewn gwrthdrawiad gyda cherbyd y diwrnod hwnnw. Ond diolch byth, roedd Hayden yn andros o ffodus am na chafodd o anafiadau parhaol.”

Yn ôl y Cynghorydd Thomas: “Dwi’n croesawu’r newyddion ac mae hwn yn gam i'r cyfeiriad cywir. Byddwn yn annog pobl leol i fynd i weld y cynlluniau, fel y gallant weld drostynt eu hunain, sut y bydd hyn yn gwella diogelwch y ffyrdd ac yn gwella’r profiad o deithio i bawb sy'n defnyddio’r ffordd. Y groesfan ddiogelwch fydd y cam nesaf yn fy ymgyrch barhaus fel cynrychiolydd Penrhyndeudraeth Plaid Cymru ar Gyngor Gwynedd.”