Plaid Cymru Gwynedd Grŵp Cynghorwyr

Mae’r iaith Gymraeg ac addysg ar flaen yr agenda yn Eifionydd wrth i bentref Chwilog baratoi ar gyfer buddsoddiad pellach yn yr ysgol leol.

Mae cymuned Chwilog, ger Pwllheli a’r cyffiniau yn paratoi ar gyfer cynnydd yn niferoedd yr ysgol, wrth i fwy o fuddsoddiad mewn tai ar gyfer pobl leol roi cyfle i deuluoedd ffynnu yn yr ardal.

Yr wythnos hon (dydd Mawrth, 24 Ionawr) mae cabinet Cyngor Gwynedd wedi cymeradwyo hysbysiad statudol sydd ei angen i gynyddu capasiti’r ysgol dros 25%, gan roi’r gallu a lle i’r ysgol addysgu hyd at 95 o ddisgyblion o’r nifer presennol, 65 disgybl. Bu cynnydd cyson yn nifer y disgyblion dros y pum mlynedd diwethaf.

Mae grant cyfalaf a refeniw addysg cyfrwng Cymraeg wedi’i glustnodi i ddatblygu ystafell ddosbarth ychwanegol yn yr ysgol ynghyd ag athro ychwanegol. O’i gytuno gan y cabinet ac wedi’r cyfnod rhybudd statudol, gallai’r datblygiad fod yn barod ar gyfer y flwyddyn ysgol newydd ym mis Medi eleni.

“Mae’n galonogol gweld ysgol bentref yng nghanol cymuned Gymraeg lle mae dros 70% o’r trigolion yn siarad Cymraeg yn ffynnu,” eglura’r Cynghorydd Beca Brown sy’n arwain ar addysg yng Nghyngor Gwynedd (llun uchod).

“Mae sicrhau bod y bobl ifanc yma yn Ysgol Chwilog yn cael y cyfleoedd gorau i ffynnu a datblygu o fewn eu lleoliad addysgol yn bwysig, ac rydym yn falch iawn o allu cynllunio ymlaen llaw ar gyfer y cynnydd hwn. Bydd ein staff gweithgar yn yr ysgol hefyd yn elwa o adnoddau ychwanegol a gwell amgylchedd waith.”

Cysylltodd corff llywodraethu Ysgol Chwilog, ynghyd ag Ysgol Bro Lleu a Llanllechid â’r adran addysg yn haf 2021 i drafod capasiti. Bu Cyngor Gwynedd yn llwyddiannus yn gwneud ceisiadau am arian i ddatblygu o fewn y tri lleoliad, gyda Chwilog yn dilyn proses rhybudd statudol oherwydd maint y cynnydd yng nghapasiti’r ysgol.

Yn ôl y Cynghorydd Rhys Tudur, cynrychiolydd Llanystumdwy ar Gyngor Gwynedd sy’n cynnwys ardal Chwilog: “Mae hyn yn newyddion gwych i’r ardal ac rydym yn gweld y manteision a ddaw yn sgil tai newydd wrth i deuluoedd ifanc ymgartrefu yn yr ardal, diolch i gefnogaeth adeiladwr egwyddorol lleol am werthu’r holl dai i bobl lleol.

“Mae blaengynllunio ar gyfer sicrhau lle i blant ychwanegol fynychu ein hysgol leol yn hanfodol ac dwi’n falch bod cabinet Plaid Cymru Gwynedd wedi llwyddo i sicrhau buddsoddiad i’r ysgol er mwyn datblygu’r capasiti a chreu ystafell ddosbarth ychwanegol.

“Mae creu ysgol sy’n addas i bwrpas ar gyfer staff a phlant yn hollbwysig er mwyn sicrhau cynnydd a lles. Dwi’n falch iawn bod grant iaith Gymraeg i gyflogi athro/athrawes ychwanegol yn Ysgol Chwilog hefyd wedi’i gytuno er mwyn sicrhau bod y staff a’r disgyblion presennol yn cael cefnogaeth pellach wrth i’r ysgol dyfu.”

Fel rhan o’r hysbysiad statudol, bydd y cyhoedd yn cael 28 diwrnod i wneud sylwadau ar unrhyw newidiadau, gydag adroddiad yn cael ei gyflwyno i gabinet Cyngor Gwynedd ym mis Ebrill.