Plaid Cymru Gwynedd Grŵp Cynghorwyr

Mewn cyfarfod arbennig o gabinet y Blaid yng Ngwynedd heddiw, cyflwynwyd mater brys i’r aelodau etholedig ystyried cefnogi teuluoedd sy’n wynebu heriau dros gyfnod y gwyliau haf.

Gyda chwta fis i fynd cyn diwedd y flwyddyn ysgol, cyhoeddodd y Llywodraeth Lafur yng Nghaerdydd na fyddent yn cefnogi teuluoedd trwy gynnig taliadau tuag at brydau bwyd plant dros gyfnod gwyliau’r haf eleni.

“Dwi’n ofnadwy o siomedig yn y Llywodraeth yng Nghaerdydd,” meddai’r cynghorydd sydd â chyfrifoldeb dros addysg yng Ngwynedd, Beca Brown.

“Mae’r ysgol yn cau i nifer heddiw, ac ma cyhoeddiad fel hyn llai na mis cyn diwedd y tymor, yn sicr o fod wedi ysgwyd rhieni sy’n cael prydau ysgol am ddim, ac oedd eisoes yn pryderu am y costau o gynnal eu teuluoedd dros gyfnod yr haf.

“Dwi’n cywilyddio ein bod ni fel cymdeithas yn yr 21Ganrif yn y fath sefyllfa o orfod poeni am fwydo a dilladu plant. Dyma effaith go iawn llymder y Torïaid trahaus yn Llundain dros y pymtheg mlynedd ddiwethaf ar gymunedau Cymru.

“Dwi’n falch heddiw o fod yn Gynghorydd Plaid Cymru yng Ngwynedd sy’n gweithredu ar ran ein cymunedau. Trwy drafod gyda fy nghyd-aelodau, rydym, fel cabinet, wedi cyfarwyddo i swyddogion ryddhau £316,000 o falansau’r cyngor, i gefnogi teuluoedd incwm isel Gwynedd.

Dros yr haf hwn, bydd rhieni bron i 3,000 o blant a phobl ifanc sy’n cael cinio ysgol am ddim, yn ysgolion cynradd ac uwchradd Gwynedd yn gallu hawlio cefnogaeth o £3.90 y dydd, i brynu bwyd.

“Estyn llaw ydyn ni, wnaiff o ddim datrys bob problem, ond mae’n mynd peth o’r ffordd i helpu,” meddai’r Cynghorydd.

Fel un sy’n weithgar yng nghynllun bwyd ardal Llanrug, a banc bwyd ardal Cwm-y-Glo yn wythnosol, mae’r Cynghorydd Beca Brown yn llwyr ymwybodol o’r heriau sy’n wynebu teuluoedd. Trwy gydweithio â FairShare ym Mangor, mae bwyd yn cael ei gasglu, ei ddidol a’i becynnu yng Nghwm-y-Glo gan gynghorwyr a gwirfoddolwyr gweithgar o’r gymuned bob wythnos, cyn dosbarthu’r pecynnau bwyd i stepen drws nifer yn y cymunedau.

Mae’r Cynghorydd hefyd yn trefnu derbyn a dosbarthu gwisgoedd ysgol dros gyfnod yr haf, i geisio ail ddefnyddio dilladach yn hytrach na thaflu a chreu gwastraff dianghenraid. Mae hefyd yn lleihau’r pwysau ariannol sydd ar deuluoedd i brynu gwisgoedd ysgol newydd. 

Yn ôl y Cynghorydd Dyfrig Siencyn, Arweinydd Y Blaid yng Ngwynedd: “I ni fel cabinet Plaid Cymru Gwynedd, roedd hwn yn benderfyniad hawdd - darganfod yr arian i gefnogi’n teuluoedd sydd wedi eu diystyru gan ein Llywodraeth.

“Un o’n mesurau yn unig yw hwn. Mae cefnogaeth o bob math ar gael gennym i roi help llaw i drigolion sy’n ei chael hi’n anodd, ac mae’r wybodaeth yna ar gael ar wefan Cyngor Gwynedd. Os oes unrhyw un yn pryderu am golli eu cartref, angen help gyda budd-daliadau, yn methu talu treth y cyngor ag ati, mae na help ar gael. Does dim cywilydd cysylltu i holi am gymorth - da chi, gwnewch!

“Dwi’n falch o’r gwaith mae nifer o’m cyd-gynghorwyr a gwirfoddolwyr gweithgar yn ei wneud yn gyson ar lawr gwlad. Gadewch i ni gefnogi’n gilydd a diolch am gymunedau clos Cymreig sy’n parhau i ofalu am ei gilydd,” meddai’r Cynghorydd Dyfrig Siencyn.

Anogir teuluoedd sy’n derbyn cinio ysgol am ddim i gysylltu â’r Adran Addysg trwy wefan y cyngor www.gwynedd.llyw.cymru neu ffonio ar 01286 685047 i wneud cais am y gefnogaeth.

Am help gyda’r argyfwng costau byw ewch i: www.gwynedd.llyw.cymru/CymorthCostauByw